SONJA BISERKO OTVORENO: “Sve ukazuje da je na djelu bio scenario upada srpske vojske na sjever i PODJELA KOSOVA”… (foto)

Biserko upozorava da je upad banjske grupe na sjever Kosova ozbiljan pokazatelj u kojem pravcu stvari mogu krenuti i koje se mogu ponoviiti ukoliko se zapadna politika na Balkanu ne resetuje.

Napad na sjeveru Kosova, odnosno upad Banjske grupe, koji je zvanična Priština okarakterisala kao teroristički napad i akt agresije, upozoravaju brojni političari i analitičari, posljednje je upozorenje da se tenzije moraju smiriti kako bi se izbjegao najgori scenario, a to je izbijanje rata na prostoru Balkana koji bi se, kako neki tvrde, mogao proširiti i na Evropu.

Predsjednica Helsinškog odbora za ljudska prava Srbije Sonja Biserko u razgovoru za CdM kaže da se upad Banjske grupe na sjever Kosova mogao očekivati imajući u vidu ponašanje Beograda posljednjih nekoliko mjeseci.

“Grafiti ‘Kad se vojska na Kosovo vrati’ kao najava preplavili su ne samo Beograd, već i unutrašnjost Srbije’. Zatim govor predsjednika Aleksandra Vučića na Generalnoj skupštini, njegov ton i poruka- sve to ukazuje da se nešto priprema. Beograd je uvijek bio transparentan u svojim namjerama, kao 90-tih kad je krenuo u rušenje Jugoslavije, svaka akcija i namjera bila je najvaljena u medijima”, jasna je Biserko.

Podvlači da, kako informacije pristižu, sve je jasnije da je na djelu bio scenario za izazivanje sukoba kako bi onda i srpska vojska ušla da zaštiti srpski narod na sjeveru i tako realizuje podjelu Kosova.

Pređena crvena linija

To je uostalom, dodaje ona, opcija koju podržava skoro cijela politička i akademska elita, službe, vojska, veliki dio civilnog sektora a reklo bi se po izvještavanju, i mediji.

“Ova operacija, bez obzira ko je u Beogradu za nju direktno odgovoran, je prešla crvenu liniju koju zapad ne može tolerisati. Ovu situaciju nije isprovocirao Kurti kako u Beogradu većina komentariše. Naprotiv, on je pokazao zrelost a kosovska policija profesionalnost”, kaže Biserko.

Mada, kako dodaje, Vučić pokušava da se odbrani i da odgovornost prebaci na kosovske Srbe, koji su ionako njegovi taoci, tvrdeći da on ne kontroliše Kosovo – sve informacije navode da je Beograd bio impliciran.

“Ukoliko Vučić, koji tvrdi da nije znao šta se dešava, onda se postavlja i pitanje ko je ključna figura u Beogradu. Istraga potvrdjuje da se radi o dobro opremljenoj (borna kola pripadaju MUP-u Srbije i arsenal oružja, po procjeni, za 200 ljudi) i uvježbanoj grupi koju je predvodio Radoičić, inače pod američkim sankcijama. On je navodno ranjen i nalazi se na VMA. Još nisu objavljeni identiteti uhapšenih ali vjerovatnoća je, kako neki analitičari ukazuju, da su mnogi bili i na ukrajinskom ratištu na ruskoj strani”, napominje Biserko.

Rusija buši Balkan

Prema njenim riječima, Rusija svakako ima interes da buši Balkan i kreira tenzije i otvara kritične tačke kako bi ometala ili odvukla dio pažnje od Ukrajine. Indikativno je, napominje, da je Vučić sljedećeg dana primio ruskog ambasadora da se žali kako Kurti pripema „etničko čišćenje Srba“.

“SPC je promptno reagovala saopštenjem eparhije raško-prizrenske i prva je javno ukazala da je nepoznata i maskirana grupa ljudi upala u dvorište crkve u Banjskom”, kaže Biserko.

Ona podvlači da je odgovorna i međunarodna zajednica što predugo toleriše ponašanje predsjednika Vučića i njegove prijetnje susjedima koje su svakodnevne i koje su neminovno vodile u sukob.

“Beograd je veoma dobro razumio zapadnu politiku appeasmenta koja u suštini favorizuje Srbiju kao regionalnog igrača na štetu njenih manjih susjeda i predstavlja dugoročni izvor tenzija u regionu zbog aspiracija Beograda. Međutim, ta politka nije i vjerovatno neće motivisati Srbiju da se okrene Zapadu. Jer, Srbija nije prihvatila novu realnost u regionu, niti međunarodno priznate granice i na djelu je pokušaj revizije poraza”, smatra ona.

Srbija da uvede sankcije Rusiji i prizna Kosovo

Biserko upozorava da je upad banjske grupe na sjever Kosova ozbiljan pokazatelj u kojem pravcu stvari mogu krenuti i koje se mogu ponoviiti ukoliko se zapadna politika na Balkanu ne resetuje.

“SAD i EU trebaju Srbiju istjerati na čistinu u pogledu njene budućnosti i u tom smislu čvrsto zahtijevati sprovođenje već postavljenih zahtjeva – sankcije Rusiji i priznanje Kosova”, zaključila je Biserko u razgovoru za CdM.

izvor: cdm.me